Presidenti i SHBA-së, Donald Trump, gjatë fjalës së tij në punimet e Asamblesë së Përgjithshme të OKB-së, ka falënderuar publikisht Shqipërinë dhe Kosovën për angazhimin e tyre në lehtësimin dhe stabilizimin e situatës në Rripin e Gazës.

Gjatë fjalimit, Trump vuri në dukje rolin e vendeve të ndryshme që kanë zotuar trupa ushtarake, forca policore dhe programe trajnimi për të garantuar sigurinë në rajon. Mes shteteve të përmendura prej tij ishin Indonezia, Maroku, Shqipëria, Kosova, Kazakistani, Egjipti dhe Jordania.

Presidenti amerikan theksoi gjithashtu miratimin e Planit të Paqes prej 20 pikash nga Këshilli i Sigurimit të OKB-së, si dhe formimin e Bordit të Paqes, një strukturë e përbërë nga rreth 30 shtete që ai vetë kryeson. Sipas tij, ky bord po menaxhon miliarda dollarë ndihma humanitare dhe financiare për rindërtimin e zonës, të dhuruara nga vendet partnere.

Trump nënvizoi se përmes ndërmjetësimeve diplomatike, përdorimit të marrëdhënieve tregtare dhe tarifave, administrata e tij ka arritur të ndërmjetësojë marrëveshje paqësore dhe të ulë tensionet në disa konflikte ndërkombëtare, përfshirë ato mes Kosovës dhe Serbisë, Armenisë dhe Azerbajxhanit, si dhe Pakistanit e Indisë.

Deklarata e Trump në OKB

Nëntëmbëdhjetë muaj më parë, kur u ula përballë udhëheqësve të mëdhenj në këtë sallë, lufta në Gazë ende po zhvillohej me një egërsi të egër. Pengjet ishin ende thellë në tunetet e Hamasit dhe nuk shihej asnjë dritë në fund të tunelit. Me sa duket, kjo nuk do të zgjidhej kurrë. Por këtu, në prapaskenat e Asamblesë së Përgjithshme, ne hodhëm hapat e parë. Dhe kjo ndryshoi gjithçka. Disa javë më vonë, ne i dhanë fund luftës në Gazë, duke shpëtuar mijëra e mijëra jetë njerëzish. Po ashtu, sollem sërish në shtëpi të gjithë pengjet e mbetura, si të gjallët, ashtu edhe ata që kishin ndërruar jetë. Secilin prej tyre. Ju falënderoj.

Faleminderit. Të gjithë menduan se ishte një mrekulli që ia dolëm mbanë, dhe njerëzit festuan rrugëve. Dua t’i shpreh mirënjohjen time Këshillit të Sigurimit të Kombëve të Bashkuara për miratimin unanim të Planit tonë të Paqes prej 20 pikash për Gazën dhe për aprovimin zyrtar të Bordit të Paqes. Ky do të jetë një grup mjaft i rëndësishëm njerëzish. Afërsisht 30 shtete i janë bashkuar këtij bordi, të cilin kam nderin ta kryesoj, dhe u jemi mirënjohës shumë prej këtyre vendeve anëtare për kontributin e miliarda e miliarda dollarëve për ndihmë humanitare.

Këto fonde shkojnë drejtpërdrejt te rindërtimi dhe lehtësimi i situatës në Marok, Bahrain, Katar, Kuvajt, Kazakistan, Arabi Saudite, Turqi, Pakistan dhe shumë vende të tjera që dhuruan. Ajo ndihmë financiare shkon drejtpërdrejt në burim, pikërisht aty ku është nevoja më e ngutshme. Dhe këto shtete janë treguar jashtëzakonisht bujare. Të tjerë gjithashtu po angazhohen me shifra që askush nuk do t’i besonte, sepse duan të shohin njerëzit të jetojnë; duan që ndihma humanitare të realizohet siç duhet. Kanë qenë thjesht fantastikë.

Gjithashtu, dëshiroj të falënderoj ata që kanë zotuar trupa ushtarake, polici dhe trajnime për të ndihmuar në stabilizimin e Gazës, përfshirë Indonezinë, Marokun, Shqipërinë, Kosovën, Kazakistanin, Egjiptin, Jordaninë e të tjerë.

Që nga marrja e detyrës, ka qenë një nder i madh për mua të zgjidh tetë lufta, dhe përmes kësaj të krijoj marrëdhënie miqësore me udhëheqësit e shumë prej këtyre vendeve. Ishte një nder i madh. Shumë prej këtyre konflikteve kishin zgjatur për vite me radhë, madje edhe dekada. Arsyeja pse munda t’u jepja zgjidhje këtyre marrëveshjeve ishte përdorimi i marrëdhënieve të mia të veçanta — marrëdhënie vërtet të veçanta që vazhdojnë edhe sot. Marrëdhëniet tregtare, përdorimi i tarifave apo kërcënimi me to, si dhe faktorë të tjerë që vareshin nga vendi përkatës.

Ndër to përfshihen kushtet e paqes mes Kamboxhias dhe Tailandës, Kosovës dhe Serbisë, Republikës Demokratike të Kongos dhe Ruandës, Pakistanit dhe Indisë, Armenisë dhe Azerbajxhanit, si dhe, natyrisht, lufta në Gazë — e cila, siç e përmenda, përfshin kthimin e të gjithë pengjeve, si të gjallëve ashtu edhe të të vdekurve.

/rtsh.al/