Presidenti amerikan Donald Trump ka kërkuar nga Izraeli dhe Irani të arrijnë një marrëveshje, duke u zotuar se ai do të jetë në gjendje t’i bindë ata.

Komentin ai e bëri në një postim në rrjetin social “Truth Social”, ku shprehet optimist se kjo do të ndodhë së shpejti.

Trump përmend tensionet e fundit midis vendeve në mbarë botën, të cilat ai thotë se ka ndihmuar për të ndaluar, teksa ndalet edhe te mosmarrëveshjet mes Serbisë dhe Kosovës, ku shkruan se ndaloi një përshkallëzim të mundshëm të konfliktit në luftë gjatë mandatit të tij të parë.

“Irani dhe Izraeli do të duhet të bëjnë një marrëveshje, dhe ata do të bëjnë një marrëveshje, ashtu siç e binda Indinë dhe Pakistanin të arrijnë marrëveshje, në këtë rast duke përdorur tregtinë me Shtetet e Bashkuara, për të sjellë logjikë, koherencë dhe qetësi në bisedime me dy udhëheqës të shkëlqyer që ishin në gjendje të merrnin shpejt një vendim dhe të ndalonin!

Gjithashtu, gjatë mandatit tim të parë, Serbia dhe Kosova ishin në tension të madh, siç kanë qenë për shumë dekada, dhe ky konflikt i gjatë ishte gati të shpërthente në LUFTË. E ndalova! (Biden i ka dëmtuar perspektivat afatgjata me disa vendime shumë idiote, por unë do ta ndreq përsëri!). Një rast tjetër është Egjipti dhe Etiopia, dhe mosmarrëveshja e tyre për një digë të madhe që prek lumin e mrekullueshëm Nil. Ka paqe, të paktën për momentin, falë ndërhyrjes sime, dhe do të mbetet kështu!

Po kështu, së shpejti do të kemi paqe midis Izraelit dhe Iranit! Shumë telefonata dhe takime po zhvillohen tani. Unë bëj shumë dhe kurrë nuk marr merita për asgjë, por kjo është në rregull, e kupton Laos. Bëjeni Lindjen e Mesme përsëri të madhe!”, shkruan ai.

Irani dhe Izraeli vazhdojnë të shkëmbejnë sulme pasi Izraeli sulmoi Iranin, duke goditur objektet bërthamore, vendet ushtarake dhe zonat e populluara. Irani është përgjigjur me sulme dronë dhe raketa balistike.

/rtsh.al/