Këshilli i Ministrave ka vendosur në mbledhjen e kësaj të premte (6 shkurt) t’i besojë postin e rëndësishëm në pushtetin lokal, atë të Prefektit të Tiranës, ish-prokurorit Shkëlqim Hajdari. Ky i fundit ka shërbyer që nga viti 2016 si Kryeinspektor i Përgjithshëm, ndërsa dha dorëheqjen nga detyra në janar të këtij viti.

Në një karrierë mbi dy dekada në sistemin e Drejtësisë, Hajdari ka mbajtur disa funksione të rëndësishme. Ai ka qenë Kryetar i Shoqatës Kombëtare të Prokurorëve për katër vite, nga 2012 deri në 2016, ndërsa më herët, nga 2008 deri në 2015, ka ushtruar detyrën e Drejtuesit të Prokurorisë së Apelit në Tiranë. Nga 2016 deri në janar 2026 ai mbajti detyrën e Inspektorit të Përgjithshëm.

Hajdari është i diplomuar në Fakultetin e Drejtësisë të Universitetit të Tiranës. Në vitin 2009 ka përfunduar një master në të Drejtën Penale, ndërsa në 2012 ka mbrojtur doktoraturën në të Drejtën Penale.

/rtsh.al/