Ministri i Mbrojtjes, Pirro Vengu dhe ai i Brendshëm, Ervin Hoxha, ishin në Landfillin e Elbasanit, ku falënderuan nga afër ekipin e forcave operacionale, që luftuan për gjashtë ditë me radhë për shuarjen e flakëve.

Ministri Vengu tha se do të merren masa konkrete për parandalimin e zjarreve duke instaluar kamera termike.

“Tani është momenti që të vijojmë me masat parandaluese, në mënyrë që të kemi monitorim me kamera termike dhe të jemi në kushte të reagimit të menjëhershëm sa herë që do të jetë nevoja,” u shpreh ministri Vengu.

Ai foli edhe mbi matjet e bëra në ajër pas zjarrit.

“Forcat e specializuara të Forcave të Armatosura për elementet kimike kanë bërë matjet dhe na rezulton që në zonat urbane dhe në zonat përreth nuk ka pasur elemente shqetësimi. Kjo është analiza jonë,” sqaroi z. Vengu.

Policia nga ana e saj ka referuar materialet në prokurori.

“Shumë shpejt do të kemi edhe arsyet e vërteta të këtij zjarri,” deklaroi ministri i Brendshëm, z. Hoda.

Kryebashkiaku i Elbasanit u kërkoi ndjesë qytetarëve me situatën e krijuar për shkak të pezullimit të grumbullimit të mbetjeve në landfill.

“Ka pasur problematika me mbingarkesën gjatë këtyre ditëve. Kjo situatë po stabilizohet. Po bëhet edhe transportimi i mbetjeve provizore për dy-tre ditë në pozicione të caktuara,” u shpreh kryebashkiaku Gledis Llatja.

Në këtë aksion janë angazhuar të gjitha institucionet, si vendore, edhe qendrore, për të mos pasur situata të ngjashme në të ardhmen.

Gazetare: Lusi Përgjegji

/rtsh.al/