Një tjetër hap i rëndësishëm është hedhur drejt mbrojtjes dhe zhvillimit të qëndrueshëm të Parkut Kombëtar të Vjosës. Pas miratimit në Kuvend dhe dekretimit nga Presidenti i Republikës, Bajram Begaj, ka hyrë zyrtarisht në fuqi ligji për ratifikimin e marrëveshjes së bashkëpunimit teknik mes Shqipërisë dhe Gjermanisë për projektin mjedisor “Green Vjosa” (Vjosa e Gjelbër).

Ky projekt ambicioz, i cili synon një zhvillim rajonal të gjelbër dhe gjithëpërfshirës në zonën e ujëmbledhësit të lumit Vjosa, vjen si dëshmi e bashkëpunimit të ngushtë strategjik mes dy vendeve, me synim nxitjen e ekonomisë lokale pa cenuar ekosistemin unik të lumit të fundit të egër në Evropë.

Detajet e financimit

Në bazë të dokumentit zyrtar, qeveria e Republikës Federale të Gjermanisë ka angazhuar një fond të konsiderueshëm për mbështetjen e kësaj nisme.

Përmes paktit dypalësh, qeveria gjermane rikonfirmon mbështetjen e saj të drejtpërdrejtë:

“Qeveria e Republikës Federale të Gjermanisë vë në dispozicion për projektin shërbime në personel dhe në materiale, si dhe eventualisht kontribute financimi në një vlerë të përgjithshme deri 3,000,000 euro.”

Zbatimi i këtij projekti madhor i është besuar Shoqërisë Gjermane për Bashkëpunim Ndërkombëtar (GIZ), një partner afatgjatë në zhvillimin e kapaciteteve teknike, administrative dhe mjedisore në Shqipëri. Për më tepër, marrëveshja lë të hapur mundësinë për rritje të mëtejshme të fondeve ose përthithjen e bashkëfinancimeve nga donatorë të tjerë në të ardhmen.

Lehtësitë fiskale për një zbatim të shpejtë

Për të garantuar ecurinë e pandërprerë të projektit dhe përdorimin maksimal të fondeve për qëllime zhvillimore, Këshilli i Ministrave ka marrë përsipër të krijojë një mjedis të plotë lehtësues fiskal. Organizata zbatuese përjashtohet nga të gjitha taksat e drejtpërdrejta në territorin shqiptar.

Dokumenti ligjor e thekson qartë këtë angazhim shtetëror:

“Republika e Shqipërisë e përjashton nga TVSH-ja apo tatime të ngjashme indirekte materialet e siguruara apo shërbimet e shfrytëzuara nga organizata gjermane zbatuese… si dhe përjashton materialet e importuara, përfshirë këtu pajisjet dhe automjetet nga të gjitha detyrimet e importit dhe të eksportit, duke garantuar zhdoganimin e tyre pa vonesë.”

Për të shmangur zvarritjet burokratike dhe për të nxitur efikasitetin, marrëveshja vendos korniza të rrepta kohore për përdorimin e fondeve evropiane. Shumat e premtuara rrezikojnë të zhvlerësohen përfundimisht nëse kontratat e zbatimit nuk nënshkruhen brenda një afati pesëvjeçar, specifikisht jo më vonë se data 10 tetor 2029.

Kjo marrëveshje, e theksuar në hyrje të saj se është nënshkruar “në frymën e marrëdhënieve ekzistuese miqësore me qëllim për të kontribuar në zhvillimin social, ekonomik dhe mjedisor”, pritet të sjellë një model të ri të turizmit të qëndrueshëm dhe ruajtjes së biodiversitetit në jug të vendit.

/rtsh.al/