Janë publikuar pamje me dron nga stani ku fshihej 43-vjeçari Violand Braçellari, i cili qëlloi për vdekje efektivin e “Shqiponjave” Enea Mekollin dhe plagosi kolegun e tij, Edison Adrin.

Ngjarja u regjistrua mëngjesin e kësaj të enjte (4 qershor) në Lozhan të Maliqit, ku efektivët kanë qenë në ndjekje të 43-vjeçarit, i cili rezultonte i shpallur në kërkim për veprat penale që lidhen me kultivimin dhe shitjen e lëndëve narkotike.

Gjatë ndërhyrjes, Braçellari ka qëlluar në drejtim të policisë, duke i marrë jetën efektivit Mekolli, 34 vjeç, ndërsa kolegu i tij, Edison Adri mbeti i plagosur, pasi ka marrë dëmtime në kokë dhe në qafë.

Ai ndodhet në Spitalin e Traumës në Tiranë, ku po i nënshtrohet ndërhyrjes kirurgjikale. Po ashtu i plagosur ka mbetur edhe autori Braçellari, i cili është dërguar në Spitalin e Traumës.

Ai ishte person i shpallur në kërkim pasi është  dënuar në 2017-ën me 9 vite e 11 muaj burg për dy vepra penale, “Prodhimi dhe shitja e narkotikëve” dhe “Kultivimi i bimëve narkotike”.

/rtsh.al/