UEFA dhe Conmebol, bashkë me federatën spanjolle dhe atë argjentinase, kanë njoftuar sot zyrtarisht vendin, datën dhe orarin e “Finalissima 2026”.

Dy fituesit e titujve kontinentalë, Europianit 2024 dhe Kupës së Amerikës 2024, do të përballen në stadiumin “Lusail” të Katarit të premten e 27 marsit. Ndeshja që starton në orën 21:00 organizohet nga Komiteti Organizator Lokal i Katarit për eventet futbollistike.

Pas një bashkëpunimi mes UEFA-s dhe Conmebol, “Finalissima’ është futur si aktivitet me qëllimin për të bashkuar më të mirën e kombëtareve europiane dhe amerikano-jugore. Argjentina, kampione në fuqi e botës, fitoi edicionin e parë të “Finalissima” në 2022-shin, pasi mundi Italinë 3-0 në stadiumin “Wembley” të Londrës.

“Finalissima bashkon dy kampionë kontinentalë në një nga eventet më prestigjioze të futbollit, duke evidentuar efektin global të futbollit dhe lidhjen mes konfederatave tona. Mezi e presim këtë mbrëmje”, – ka deklaruar presidenti i UEFA-s, Aleksander Ceferin.