Debateve të brendshme të demokrateve duhet t‘ju vijë fundi si një mundësi për të ndryshuar realitetin politik në vend. Sugjerimi vjen nga aleati tradicional i demokratëve kryerepublikani Fatmir Mediu.

“Pa qenë të bashkuar dhe a e kthyer këtë bashkim në mandate edhe koncepti i reformës zgjedhore do të jetë jashtëzakonisht problem për të ndryshuar këtë realitet të papranueshëm, këtë qeveri të korruptuar, të inkriminuar etj.” shprehet z. Mediu.

Në intervistën dhënë për RTSH-në, kryetari i PR-së tha se opozita nuk duhet të mbetet peng i vendimit të gjyqësorit për përcaktimin e përkatësisë së vulës së Partisë Demokratike. Sipas tij, koalicioni i opozitës duhet të krijojë sa më parë logon e tij, një praktikë që sikundër tha e djathta e ka aplikuar edhe në zgjedhjet e shkuara.

“Kjo do të zgjidhte përkohësisht edhe problemin që ka logoja e Partisë Demokratike, se kujt do t’i shkonte. Nuk mendoj se ky është një proces që nuk dinë si të vendosin, por nuk duan, sepse një opozitë e përçarë i intereson pushtetit të sotëm. Nëse duam të organizohemi si opozitë edhe elektoralisht duhet patjetër të brandojmë një logo të këtij koalicioni. Sido që të vejë çështja e logos, unë mendoj se brenda këtij koalicioni do të marrë vlerën që do të marrë, por do të ishte më relative sesa të encim vetëm me një koalicion me logon e PD-së,“

Z. Mediu tha se opozita duhet të përgatisë stategjinë për mënyrën sesi do të përfaqësohet në zgjedhjet e ardhshme, sikundër duhet të vijojë të insistojë për të rimarrë përmes ndryshimeve të pritshme në kodin zgjedhor, koalicionet parazgjedhore.

Gazetare: Anisa Kadesha

/ rtsh.al /