Një super Dortmund mposht Freiburgun dhe paralajmëron Bayernin, me një 5-1 ndaj forcës së katërt të Bundesligës në ndeshjen hapëse të javës së nëntëmbëdhjetë. Në Signal Iduna Park, verdhezinjtë kaluan në epërsi në minutën e 14-të: një goditje këndi nga Brandt dhe një goditje me kokë e Meunier, i cili mposht Uphoff dhe firmos 1-0 për mikpritësit. Në minutën e 29-të, vjen dyfishimi dhe është fotokopje e golit të parë, ku ish-lojtari i PSG-së godet saktë me kokë.

Në rikuperim arrin edhe goli i tretë: Bellingham rikuperon topin dhe i shërben Haaland në zonë, i cili kontrollon dhe shënon 3-0 me të cilin përfundon pjesa e parë. Freiburg rikompozohet në pjesën e dytë dhe shkurton distancën në minutën e 61-të: Kobel neutralizon në diagonalen e djathtë të Sallait, por Demiroviç përfiton duke finalizuar mundësinë e krijuar.

Megjithatë, është thjesht një iluzion, sepse në minutën e 75-të Dahoud vjedh topin dhe i shërben Haaland-it vertikalisht, i cili e kalon topin nën këmbët e Uphoff dhe mbyll ndeshjen. Ka kohë edhe për një gol të fundit, që vjen në minutën e 86-të: Dahoud me një gjuajtje me të djathtën në shtyllën e largët gjen kënaqësi personale, duke nënshkruar 5-1 përfundimtar.

Me këtë sukses të jashtëzakonshëm, Dortmundi kalon përkohësisht në -3 nga Bayern, që do të ketë një provë të vështirë në fushën e Këlnit. Nga ana tjetër, ky nokaut rrezikon të zhvendosë Freiburg nga vendi i katërt në të shtatë.