Presidentja Vjosa Osmani ka deklaruar se Kosova po përballet me sulme të vazhdueshme nga Serbia.

Duke folur në konferencën pas takimit me Sekretarin e Jashtëm britanik, David Lammy, presidentja Osmani tha se në dialog me Serbinë, Kosova mbetet një palë konstruktive e përkushtuar për paqe e stabilitet pavarësisht se vendi përballet me obstruksione e provokime nga ana e Serbisë.

“Një temë e rëndësishme e diskutimit tonë ishte edhe dialogu me Serbinë. Kam ripërsëritur edhe njëherë faktin Kosova mbetet një palë konstruktive e përkushtuar për paqe e stabilitet, pavarësisht se vazhdimisht përballemi me obstruksione e provokime nga ana e Serbisë, përfshirë edhe sulmet e njëpasnjëshme që kanë filluar vite më herët, e po vazhdojnë edhe tani”, tha presidentja e cila ka ripërsëritur kërkesën që autorët të përballen me drejtësinë.

Osmani vuri në dukje se autorët e sulmeve ndaj Kosovës duhet të vendosen përpara drejtësisë nga ana e Serbisë. Por sipas saj, Beogradi nuk ka bërë asnjë lëvizje në këtë drejtim.

“Është e domosdoshme që duhet të ketë llogaridhënie e vënie të të autorëve para përgjegjësisë nga ana e Serbisë, Por fatkeqësisht po e  shohim që nuk ka asnjë lëvizje nga ana e Serbisë as sa i përket aktit të agresionit të shtatorit 2023, as sa i përket sulmit të ushtarëve të NATO-s, por as të veprimeve të fundit terroriste që kanë ndodhur në veri të vendit”, tha Osmani.

Ndërkaq, Osmani ka falënderuar Mbretërinë e Bashkuar për mbështetjen e vazhdueshme që i kanë dhënë Kosovës.

Ajo shtoi se Kosova mirëpret angazhimin e Ministrisë së Mbrojtjes së Mbretërisë së Bashkuar edhe sa i përket eksportit të armëve në Kosovë.

“Ky hap do të kontribuojë jo vetëm në forcimin e sigurisë sonë, por edhe në avancimin e industrisë së mbrojtjes së Britanisë së Madhe”, tha Osmani.

/rtsh.al/