Kanë mbetur pak më shumë se 24 orë deri në një nga misionet më delikate nga vizita e Giorgia Melonit në SHBA, e cila sipas zëdhënëses së Komisionit Evropian është koordinua me Presidenten e Komisionit, Ursula von der Leyen.

Në fjalimin e saj në ceremoninë e ndarjes së çmimeve Leonardo në Villa Madama, duke iu referuar misionit të saj në Uashington ku do të takohet të enjten me Presidentin Donald Trump, Meloni nuk ndjen presion.

“Është një moment i vështirë, le të shohim se si do të shkojë në orët e ardhshme”. Kështu deklaroi kryeministrja e Italisë, Giorgia Meloni sa i takon takimit me Trump në SHBA.

Ndërsa do fluturojë për në Uashington këtë javë, kryeministrja italiane do të përpiqet të bindë presidentin e SHBA-së, Donald Trump, të mos vendosë tarifa të reja që do t’i jepnin një goditje të rëndë ekonomike Evropës – dhe një potencialisht vdekjeprurëse për eksportuesit italianë.

Përpjekjet e mëparshme të liderëve të tjerë evropianë për të lëkundur presidentin – përmes lajkave , kërcënimeve apo premtimeve për të blerë më shumë gaz amerikan – nuk kanë shkuar askund.

Vizita e Melonit të enjten është një mundësi për të demonstruar se evropianët ende mund të bëjnë biznes me Trump – për sa kohë që ata mbledhin nivelet e duhura të ngulmimit.

Por, angazhimi personal i Melonit me Trump ka ngritur nerva në kryeqytetet e tjera të BE-së.

Ndërsa blloku përballet me një luftë tregtare potencialisht shkatërruese, edhe homologët e saj më të kujdesshëm po i afrohen idesë se ajo mund të jetë e vetmja udhëheqëse evropiane që ai është i gatshëm të dëgjojë.

“Është ajo që e ka më të lehtë të flasë me të në mënyrë të qartë dhe të sinqertë”, pranon nënsekretari i Presidencës së Këshillit, Giovanbattista Fazzolari. Aq më tepër që në takimin dypalësh mes Sekretarit Amerikan të Tregtisë, Hoëard Lutnick dhe homologut të tij të Komisionerit Evropian Maros Sefcovic, nuk është arritur asnjë përparim konkret.

Takimi në Zyrën Ovale të Shtëpisë së Bardhë është caktuar për nesër në orën 17:00. Giorgia Meloni ka një qasje sarkastike.

“Nuk ndjej asnjë presion për dy ditët e mia të ardhshme, siç mund ta imagjinoni…” Dhe optimiste, të shohim si do të zhvillohen ngjarjet në situatën ku gjendemi. Le të kujtojmë se kemi forcën, aftësinë, inteligjencën dhe kreativitetin për të kapërcyer çdo pengesë. Ne kemi kapërcyer pengesa shumë më të këqija, do t’i kapërcejmë të tjerat.”

Vetëm një ditë pas takimit me Trump, lideri italian do të kthehet në Romë për të pritur Zëvendës Presidentin JD Vance për një vizitë shtetërore. Vance, në vizitën e tij të fundit në Evropë në janar, nisi një kundërvënie të gjerë kundër bllokut, duke akuzuar liderët e tij për dështimin për të mbrojtur fjalën e lirë ose për të ndaluar migrimin e paligjshëm.

Ndërkohë, mbrëmë Kryeministrja thirri dy zëvendëskryeministrat, Matteo Salvini dhe Antonio Tajani dhe ministrat e Mbrojtjes, Guido Crosetto, të PNRR Tommaso Foti dhe të Ministrisë së Ekonomisë, Giancarlo, para se të nisej.

Ministri i Jashtëm Tajani pohon: “Do të jetë një mision paqeje tregtar. E rëndësishme është që të mos ndalemi kurrë, as përballë vështirësive.”.

Kujtojmë se, ishte fillimi i dhjetorit teksa presidenti amerikan, Donald Trump dhe kryeministrja italiane, Giorgia Meloni u fotografuan në një dhomë ngrënieje në Pallatin Élysée, ku presidenti francez, Emmanuel Macron, priti të ftuarit pas rihapjes së Katedrales Notre Dame.

Ishte hera e parë që kryeministrja e ekstremit të djathtë të Italisë takonte Trumpin, një takim që erdhi pas vitesh të tëra të marrëdhënieve të saj të ushqyera me militantët e tij Make America Great Again (Maga).

Gjithsesi, çfarëdo që u diskutua, Meloni duket se do të ketë ndikim. Trump më vonë e përshkroi atë si “një tel të vërtetë të drejtpërdrejtë” dhe dikë me të cilin mund të punonte “për të rregulluar pak botën”. Ai mund të ketë marrë raporte pozitive për të nga Elon Musk, me të cilin kryeministri italian është takuar në disa raste dhe të cilin ajo e ka quajtur “një burrë brilant”.

/rtsh.al/