Kina ka hequr në heshtje tarifat hakmarrëse prej 125% për disa gjysmëpërçues të prodhuar në Shtetet e Bashkuara, sipas informacioneve të dhëna për CNN nga tre agjenci importi në qytetin e teknologjisë, Shenzhen.

Përjashtimet, që nuk janë bërë ende publike nga autoritetet kineze, kanë të bëjnë me qarqe të integruara – të njohura si mikroçipe – dhe u zbuluan nga agjencitë importuese të enjten në mbrëmje.

Kujtojmë se më 12 prill, Kina kishte rritur në 125% tarifat për mallrat amerikane, si kundërpërgjigje ndaj vendimit të ish-presidentit amerikan Donald Trump për të vendosur një taksë prej 145% ndaj produkteve kineze.

Megjithëse Kina ka projektuar një imazh të fortë dhe të vetëbesuar në përballjen me luftën tregtare me SHBA-në, lëvizja për të përjashtuar disa produkte sugjeron një nevojë për të siguruar komponentë kritikë që nuk mund të prodhohen lehtësisht brenda vendit.

Autoritetet kineze, përfshirë Administratën e Përgjithshme të Doganave dhe zyrat në qytetet portuale Shenzhen dhe Zhongshan, nuk kanë konfirmuar zyrtarisht përjashtimet.