Pogradeci ka mposhtur 1-0 Besën në “Elbasan Arena” në finalen e Play Off-it të Kategorisë së Parë. Një gol i bukur i shënuar nga Alidema direkt nga goditja e dënimit në pjesën e parë ka vulosur këtë fitore të çmuar të liqenorëve.

Ndonëse mbyllën sezonin e rregullt në vendin e 5-të, djemtë e Ardian Memës arritën që të eliminojnë fillimisht Burrelin dhe më pas Besën në ndeshjet e Play Off-it.

Ka edhe një “pengesë” të fundit për të arritur ëndrrën Abissnet Superiore për Pogradecin dhe ajo është Tirana. Bardheblutë mbyllën sezonin e rregullt në vendin e 8-të në kampionat. Fituesi i përballjes Tirana-Pogradeci do të jetë skuadra që do të luajë në elitën e futbollit shqiptar sezonin e ardhshëm.

Përfundon këtu ëndrra e Besës për tu rikthyer në elitë. Kavajasit ndonëse kishin pritshmëri të mëdha këtë sezon, nuk arritën që të ngjiteshin mes më të mirëve të futbollit shqiptar.