Princi Harry ka shprehur zhgënjimin e thellë pasi humbi betejën ligjore për të rikthyer të drejtën për mbrojtje policore gjatë qëndrimeve të tij në Mbretërinë e Bashkuar, duke deklaruar se vendimi i gjykatës e ka “shkatërruar” dhe e ka lënë atë dhe familjen e tij në rrezik.

Vendimi i fundit i Gjykatës së Apelit në Londër konfirmoi vendimin e mëparshëm të Ministrisë së Brendshme, i cili përcakton se Harry, pas largimit nga detyrat mbretërore në vitin 2020, nuk ka të drejtë automatike për mbrojtje të financuar nga shteti.

“Sigurisht, jam shumë i mërzitur për vendimin”, tha Harry në një intervistë për BBC-në nga Kalifornia, ku jeton me bashkëshorten Meghan Markle dhe dy fëmijët e tyre. “Unë jam ai që jam, jam pjesë e asaj që bëj pjesë, nuk mund t’i shpëtoj kësaj.”

Ai kritikoi vendimin fillestar të vitit 2020 si një vendim që “me vetëdije e vë në rrezik atë dhe familjen e tij” dhe shtoi se siguria ishte përdorur si mjet presioni për ta mbajtur brenda familjes mbretërore. Megjithatë, ai shprehu dëshirën për pajtim me familjen.

Gjykata tha se ndonëse shqetësimet e tij ishin të kuptueshme, ato nuk përbënin bazë ligjore për të përmbysur vendimin. Gjyqtari Geoffrey Vos vlerësoi argumentet e paraqitura nga avokati i Harry-t si “prekëse dhe të fuqishme”, por shtoi se ndryshimi i statusit të sigurisë nuk ishte i paligjshëm.

Ndërsa Princi Harry nuk ka vendosur ende nëse do të apelojë në Gjykatën Supreme, ai u shpreh se nuk dëshiron që kjo çështje të vazhdojë përtej kësaj pike, duke e përshkruar si “një mosmarrëveshje familjare”.

/rtsh.al/