Gjykata e Durrësit ka lënë në arrest me burg 6 personat e arrestuar dy ditë më parë gjatë operacionit “Enigma” në Gjirin e Lalzit, ndërsa një tjetër është lënë në detyrim paraqitje.

Të arrestuarit akuzohen si persona me rrezikshmëri të lartë për vepra penale në fushën e krimeve kundër personit dhe në fushën e narkotikëve.

Gjatë aksionit, policia sekuestroi edhe 4 armë zjarri pistoleta, të cilat këta persona i mbanin me vete, me fishekë në fole gati për qitje. Po gjatë operacionit, janë sekuestruar në cilësinë e provës materiale, shuma parash, euro dhe sende të tjera. 

Masat e sigurisë “arrest me burg” janë dhënë për:

1. Xhevdet Plaku alias Kiss, 45 vjeç, i akuzuar për “Trafikimi i narkotikëve”. Gjatë kontrollit, këtij shtetasi iu gjet një armë zjarri pistoletë me fishek në fole gati për qitje. 
2. Flobens Meçja alias Gega alias Drini, 43 vjeç, i akuzuar për veprat penale “Organizata kriminale”, “Kryerja e veprave penale nga grupi i strukturuar kriminal” dhe “Sigurimi i kushteve dhe i mjeteve për të kryer vrasje”. Gjatë kontrollit, këtij shtetasi iu gjetën dy dokumente identifikimi të falsifikuara dhe 1 armë zjarri pistoletë me fishek në fole gati për qitje.
3. Voltan Xhani, 39 vjeç, i akuzuar për veprat penale “Trafikimi i mjeteve motorike” kryer në bashkëpunim dhe “Sigurimi i kushteve dhe i mjeteve për të kryer vrasje”. Gjatë kontrollit fizik dhe në çantën e tij, policia gjeti 1 armë zjarri pistoletë me fishkë në fole gati për qitje.  
4. Jugert Xhani, 35 vjeç, i akuzuar për veprat penale “Prodhimi dhe mbajtja pa leje e armëve luftarake dhe e municionit”, “Moskallëzimi i krimit” dhe “Përkrahja e autorit të krimit”. Gjatë kontrollit iu gjetën 1 armë zjarri pistoletë dhe municion luftarak;
5. Oltion Hasani, 38 vjeç, i akuzuar për “Moskallëzimi i krimit” dhe “Përkrahja e autorit të krimit”
6. Fatjon Qesja, 36 vjeç, i akuzuar për veprat penale “Moskallëzimi i krimit” dhe “Përkrahja e autorit të krimit”.

Në detyrim paraqitje është lënë:

1. Alfred Hasanaj, 45 vjeç, i akuzuar për veprat penale “Moskallëzimi i krimit” dhe “Përkrahja e autorit të krimit.” 

/rtsh.al/