Mori drejtimin e Korabit në 6 mars, drejtoi skuadrën në 7 ndeshjet e fundit të sezonit dhe arriti që të mbajë ekipin në Kategorinë e Parë. Puna e tij është vlerësuar nga drejtuesit e klubit nga Peshkopia, që njoftojnë se kanë rinovuar kontratën me trajnerin Alfred Deliallisi, që do të drejtojë Korabin edhe në sezonin 2025-2026.  

“Pas një viti të vështirë ku arritëm objektivin kryesor dhe shpëtuam sezonin me shumë dinjitet, Klubi i Futbollit Korabi është i lumtur të njoftojë rinovimin e kontratës me trajnerin tonë, Alfred Deliallisi.

Sot, pas një vizite në qytetin tonë të Peshkopisë dhe ambientet sportive të klubit, u zhvillua prezantimi zyrtar i trajnerit dhe u shpalosën objektivat ambicioze për sezonin e ardhshëm. Me punën e përbashkët dhe përkushtimin, jemi të bindur se do të arrijmë suksese edhe më të mëdha.

Bashkë me ju, ne vazhdojmë të ndërtojmë historinë e Korabit!”, shkruhet në njoftimin e klubit.