Kryeministri izraelit Benjamin Netanyahu pritet të thërrasë zyrtarët e lartë në një takim për të diskutuar të ardhmen e strategjisë së Izraelit në Gazë.

Referuar burimeve pranë autoriteteve izraelite, CNN transmeton se kjo lëvizje e Netanyahut vjen një ditë pasi presidenti i SHBA-së Donald Trump tha se ishte “shumë afër” arritjes së një marrëveshjeje për konfliktin në Gazë.

“Një ekip i vogël ministrash dhe zyrtarësh të lartë të mbrojtjes do të marrin pjesë në këtë takim dhe se Izraeli është ende i interesuar në kuadrin e propozuar nga i dërguari i SHBA-së Steve Witkoff, i cili do të shihte një armëpushim në këmbim të lirimit të pengjeve izraelite, të gjallë apo të vdekur”, transmeton CNN.

Brenda qeverisë, partitë e ekstremit të djathtë duan të vazhdojnë operacionet ushtarake në Gazë derisa Hamasi të zhduket.

Por në një intervistë udhëheqësi i partisë fetare Shas, Aryeh Deri, tha se besonte se “një mundësi e madhe është shfaqur në drejtim të pengjeve në Gazë dhe mendoj se tani më shumë se kurrë janë krijuar kushtet për t’i dhënë fund luftës”.

Shas është pjesë e koalicionit qeverisës.

Trump tha të mërkurën se sulmet e SHBA-së në centralet bërthamore të Iranit mund të ndihmonin në një përparim në Gazë dhe se ishte “shumë afër” arritjes së një marrëveshjeje për atë konflikt.

Propozimi i fundit nga Witkoff bën thirrje për lirimin e 10 pengjeve izraelite dhe trupave të 18 izraelitëve të tjerë të marrë më 7 tetor 2023 si pjesë e një armëpushimi 60-ditor.

Më parë këtë muaj, Hamasi tha se nuk e kishte hedhur poshtë propozimin, por kërkonte garanci më të forta rreth fundit të luftës.

/rtsh.al/