Këtë vit, 1.380 aplikantë nga qarku i Gjirokastrës kanë aplikuar për skemën e mbështetjes me naftë për punimet e mekanizuara. Specialisti i Bujqësisë, Balil Bineri, bëri të ditur gjatë një interviste se menjëherë pas përfundimit të fazës së parë të aplikimit, ka nisur faza e kontrollit administrativ të dosjeve.

“Kontrollohet nga specialistët tanë plotësimi i dosjeve dhe i kritereve, të cilat nuk cënojnë procesin e aplikimit. Përgjithësisht, fermerët kanë mungesa të natyrës së dytë; atëherë njoftohen nga specialistët, sjellin dokumentacionin shtesë, plotësohet dosja dhe më pas dërgohet për miratim në AZHBR,” tha Bineri.

Kontrolli i dosjeve ka arritur tashmë në 70%, dhe më pas do të nisë faza e kontrollit në terren, theksoi Bineri.

“Pas kësaj faze, do të nisë kontrolli në terren, i cili realizohet nga specialistët e AZHBR-së, dhe më pas dërgohen për miratim dhe rimbursim emrat e aplikantëve fitues”, tha ai.

Për vitin 2024, në këtë skemë kanë aplikuar gjithsej 1440 fermerë, ndërsa 1401 prej tyre kanë përfituar mbështetje me naftë për punimet e mekanizuara.

Gazetare: Leonida Koçiu

/rtsh.al/