Projekti i Federatës Shqiptare të Futbollit në bashkëpunim me UEFA-n, Elite Youth Development Academy, përmbylli vitin e parë të zhvillimit të tij në Tiranë. Pjesëmarrës në këtë projekt ishin 37 djem të rinj të grupmoshës 2010 dhe 2011, të cilët u stërvitën 4 herë në javë në Shtëpinë e Futbollit.

Drejtori Teknik i FSHF, Fulvio Pea, dha një prononcim për fshf.org ku bëri një rezyme të vitit të parë të projektit Elite Youth dhe dha disa detaje nga organizimi i vitit të ardhshëm.

“Kemi përmbyllur vitin e parë të projektit tonë Elite Youth Development Academy, i dashur shumë nga Presidenti ynë, i cili ka programuar, projektuar dhe investuar në 40 djem të rinj, të cilët janë impenjuar përgjatë vitit duke bërë 4 stërvitje në javë në qendrën tonë të bukur sportive.

4 stërvitje të përbëra nga sesione teknike, taktike dhe fitness, ku këtu falënderoj Area Performance, sepse i janë afruar duke krijuar teste interesante dhe kanë nxjerrrë të dhëna që do të ndihmojnë për të vazhduar rrugëtimin në të ardhmen, si dhe departamenti i videonalizës që me video i ka dhënë mundësinë trajnerëve tanë për të studiuar gabimet dhe për të bërë korrigjimet e duhura që i ndihmojnë djemtë të përmirësohen” – u shpreh drejtori Pea.

“Projekti vitin tjetër do të transferohet në Durrës me një risi të bukur, ku në vend të 2 skuadrave do të bëhen 3, pasi do të bashkohet dhe grupi i vitit 2012. Kjo është një tjetër kërkesë nga Presidenti ynë, i cili beson shumë te futbolli i të rinjve në Shqipëri” – shtoi ai.

“Rrugëtimi i djemve tanë këtë vit është pasuruar nga prezenca e Bushit, Bulkut, Gjasulës, si dhe disa lojtarëve që luajnë në kampionatin tonë Abissnet Superiore, që sigurisht kanë ndriçuar ëndrrat e të rinjve tanë” – përfundoi Drejtori Teknik i FSHF.