Policia franceze bastisi sot selinë qendrore të partisë së djathtë ekstreme “Tubimi Kombëtar” (Rassemblement National – RN) të udhëhequr nga Marine Le Pen, në kuadër të një hetimi për shkelje të mundshme të ligjeve mbi financimin e fushatave zgjedhore dhe mashtrim.

Bastisja u krye mëngjesin e së mërkurës nga rreth njëzet oficerë policie, të shoqëruar nga dy gjyqtarë hetues, sipas deklaratës së bërë nga presidenti i RN-së, Jordan Bardella.

Ai e cilësoi operacionin si “një fushatë të re ngacmimi” ndaj partisë së tij dhe një “sulm serioz ndaj pluralizmit dhe alternimit demokratik”.

Sipas prokurorisë së Parisit, bastisja lidhet me një hetim që po zhvillohet ndaj një personi të paidentifikuar, për veprime të dyshuara që përfshijnë: mashtrim kundër një personi publik, kredi të paligjshme për fushata, pastrim parash, falsifikim dokumentesh dhe përdorim të dokumenteve të falsifikuara gjatë periudhës 2020-2024.

Hetimet janë përqendruar te financimi i fushatave presidenciale, legjislative dhe evropiane të RN-së, përkatësisht në vitet 2022 dhe 2024. Autoritetet po shqyrtojnë gjithashtu dhuratat e marra nga donatorë të pasur dhe fatura të dyshuara si të fryra për të siguruar më shumë rimbursime nga shteti.

Aktualisht, asnjë individ apo subjekt nuk është zyrtarisht i akuzuar. Hetimi, i cili nisi në korrik 2023, po drejtohet nga brigada e re financiare dhe antikorrupsion e policisë gjyqësore të Parisit.

Ish-arkëtari i partisë, z. de Saint-Just, u shpreh për mediat se bastisja ishte “skandaloze” dhe theksoi se të gjitha llogaritë e fushatave janë “miratuar dhe rimbursuar” nga autoritetet përkatëse.

Incidenti është një goditje e re për RN-në, pasi znj. Le Pen u dënua në mars për përvetësim të fondeve të BE-së dhe iu ndalua të kandidonte në zgjedhjet e vitit 2027 .

Zonja Le Pen synon të përmbysë dënimin e saj të marsit në mënyrë që të mund të kandidojë në vitin 2027 – që do të ishte përpjekja e saj e katërt për postin e lartë – por zoti Bardella ka thënë se do të kandidojë nëse ajo nuk mundet.

/rtsh.al/