Tetë persona janë arrestuar gjatë operacionit të koduar “Shame”, pasi akuzohen se kishin krijuar një rrjet prostitucioni në Elbasan. Të arrestuarit janë shtetas kinezë, brazilianë dhe shqiptarë. Prostitucioni zhvillohet në dy apartamente, që ishin marrë me qira nga dy shtetas kinezë.

Shtetasit K. Ch., 44 vjeç dhe R. C., 38 vjeç, të dy kinezë, u arrestuan për veprat penale të “Shfrytëzimit të prostitucionit” dhe “Falsifikimi i vulave, stampave ose formularëve”, të kryera në bashkëpunim. Përveç tyre, u arrestuan edhe tri shtetase, dy kineze dhe një braziliane L. N., 46 vjeçe, B. G., 52 vjeçe, dhe E. S., 23 vjeçe për akuzën e “Prostitucionit”.

Gjithashtu, në kuadër të këtij hetimi, janë arrestuar edhe tre shtetas shqiptarë: A. P., 38 vjeç, L. T., 38 vjeç dhe R. F., 28 vjeç, për veprën penale të “Prostitucionit”. Të arrestuarit shqiptarë ishin të përfshirë në promovimin dhe organizimin e aktivitetit të paligjshëm.

Policia ka sekuestruar një sasi parash në valuta të ndryshme, dokumente personale, letërnjoftime dhe vula të dyshuara false, si dhe 10 celularë që mund të shërbejnë si prova për hetimet e mëtejshme. Po ashtu, janë proceduar penalisht pronarët e dy apartamenteve, A. V., 46 vjeç dhe B. H., 36 vjeçe, dhe sanitarja O. T., 19 vjeçe, për “Mbajtjen e ambienteve për prostitucion”.

/rtsh.al/