Një analizë e detajuar e kryer nga agjencia e lajmeve Associated Press (AP) zbulon se sulmet e Iranit ndaj më shumë se dy duzina bazave ushtarake amerikane në Lindjen e Mesme u përqendruan fillimisht te sistemet e mbrojtjes dhe paralajmërimit të hershëm, përpara se të godisnin avionët, hangarët dhe godinat e banimit. Kjo strategji i ka shkaktuar ushtrisë së SHBA-së dëme materiale që vlerësohen në miliarda dollarë.

Verifikimi i AP-së, i mbështetur në imazhe satelitore nga ofrues të pavarur si Airbus (OneAtlas) dhe në dëshmitë e katër zyrtarëve ushtarakë rajonalë, konfirmon se mbi 115 sulme me dronë dhe raketa dëmtuan ose shkatërruan struktura në të paktën 26 pika ushtarake ku ndodheshin pajisje amerikane.

Targetimi i radarëve dhe shkatërrimi i mbrojtjes ajrore

Sipas gjetjeve të hetimit, Irani zbatoi një plan të shkallëzuar ushtarak. Në ditët e para të konfliktit, goditjet u përqendruan te radarët kryesorë dhe rrethimet mbrojtëse në Kampin Arifjan në Kuvajt, në Bahrein, si dhe në bazat ajrore Prince Sultan në Arabinë Saudite dhe Muwaffaq Salti në Jordani.

Në Jordani, një radar i avancuar me vlerë prej rreth gjysmë miliardë dollarësh u shkatërrua plotësisht, ndërsa një sistem tjetër radari në Katar, me vlerë 1.1 miliardë dollarë, pësoi dëmtime të rënda.

“Irani i dha përparësi goditjes në shtyllën kurrizore të sistemit të mbrojtjes ajrore të SHBA-së, duke synuar radarët kryesorë të paralajmërimit të hershëm që janë të vështirë dhe të kushtueshëm për t’u riparuar ose zëvendësuar,” deklaroi NR Jenzen-Jones, drejtor i firmës konsulente Armament Research Services.

Dëmet në infrastrukture dhe zhvendosja e aseteve

Pasi neutralizoi aftësitë zbuluese të mbrojtjes ajrore, Irani ndërmori dhjetëra sulme ndaj hangarëve të avionëve, depove të karburantit, kazermave dhe qendrave të komunikimit.

Kuvajt

Baza Ali Al Salem u godit të paktën 30 herë, duke dëmtuar 15 hangare dhe 10 ndërtesa banimi. Ndërkohë, në Kampin Buehring u shkatërruan mbi 30 struktura, përfshirë kazerma, palestra dhe mensa.

Arabia Saudite

Sulmet në bazën Prince Sultan dëmtuan një avion mbikëqyrës Boeing E-3 Sentry, dy cisterna furnizimi me karburant, si dhe një njësi të CIA-s në Riad.

Emiratet e Bashkuara Arabe

Imazhet e bazës Al Dhafra treguan hangare të shkatërruar dhe dëmtime të sistemeve të dronëve mbikëqyrës.

Si pasojë e kësaj shkalle dëmesh, SHBA-të kanë zhvendosur një pjesë të madhe të aseteve të tyre ushtarake nga rajoni i Gjirit Persik. Ekspertët e sigurisë kombëtare, si Raphael Cohen nga korporata RAND, e cilësojnë këtë situatë si një pikë kthese.

“Kjo duhet të jetë një thirrje zgjimi për Shtetet e Bashkuara. Ideja se mund të mbështetemi në infrastrukturën fikse në mënyrën që kemi bërë gjatë luftës globale kundër terrorizmit ka mbaruar,” theksoi Cohen.

Zyrtarët e Pentagonit, nga ana e tyre, refuzuan të komentojnë detajet e dëmeve për arsye të sigurisë operacionale, por pohuan se forcat amerikane mbeten të mbrojtura dhe plotësisht të pajisura për të përmbushur misionet e tyre në rajon.

/rtsh.al/