Inaugurohet aksi i ri rrugor prej 47 kilometrash që lidh Bulqizën me Librazhdin përmes segmentit Ura e Çerenecit–Zgosht. Ky aks i ri do të sjellë një ndikim të ndjeshëm në zhvillimin ekonomik, bujqësor dhe turistik të zonës.

Kryeministri Edi Rama, i cili ka shpërndarë pamjet nga ky aks i ri, deklaroi se kjo rrugë jo vetëm që forcon lidhjen mes dy qarqeve, Dibrës dhe Elbasanit, por krijon një korridor të ri lindor që afron më shumë bukuritë natyrore dhe potencialin e turizmit malor me pjesën tjetër të vendit.

“Me rrugën e re Bulqizë–Librazhd, aksi Ura e Çerenecit–Zgosht, që jo vetëm lidh Dibrën me Elbasanin, por krijon një korridor të ri lindor duke sjellë më afër bukuritë natyrore dhe pasuritë e turizmit malor, nxit ekonominë rurale dhe i jep jetë sipërmarrjeve të reja bujqësore e turistike”, shkruan Rama.

Projekti pritet të lehtësojë qarkullimin për komunitetin, fermerët dhe bizneset lokale, si dhe të rrisë vizitat në destinacione të reja turistike në Shqipërinë lindore, si Parku Kombëtar Shebenik–Jabllanicë në Librazhd, apo zonat historike dhe kulturore të Dibrës.

/rtsh.al/