Kryetarja e Kuvendit të Shqipërisë, Elisa Spiropali, po merr pjesë në Konferencën e Gjashtë të Kryetarëve të Parlamenteve të Unionit Ndërparlamentar në Gjenevë, një forum i rëndësishëm i dedikuar bashkëpunimit parlamentar, multilateralizmit për paqen, drejtësinë dhe prosperitetin. Gjatë ditës së martë, Spiropali zhvilloi dy takime kyçe me homologët e saj nga Gjermania dhe Izraeli.

Mbështetja gjermane për Shqipërinë në BE në 2030

Një nga takimet më të rëndësishme të pasdites ishte ai me Presidenten e Bundestagut Gjerman, Julia Klöckner. Spiropali theksoi marrëdhëniet e shkëlqyera dhe partneritetin e fuqishëm mes dy vendeve, si dhe bashkëpunimin e suksesshëm mes Kuvendit të Shqipërisë dhe Bundestagut. Diskutimi u përqendrua te mbështetja e Gjermanisë për objektivin strategjik të Shqipërisë: anëtarësimin në Bashkimin Evropian brenda vitit 2030.

“Shqipëria dhe Gjermania po zhvillojnë marrëdhënie të shkëlqyera, një partneritet të fuqishëm e dinamik, shkëmbime të vazhdueshme të nivelit të lartë dhe bashkëpunim të suksesshëm në mjaft sektorë si drejtësia, siguria, punët e brendshme, energjia, arsimi, turizmi, etj.,” deklaroi Spiropali.

Ajo shtoi se mbështetja e Gjermanisë, si një aleat kyç politik, është thelbësore për avancimin e reformave, integrimin evropian të Shqipërisë dhe zhvillimin, stabilitetin e paqen në rajon.

Spiropali ritheksoi angazhimin për intensifikimin e bashkëpunimit mes dy parlamenteve për thellimin e reformave, veçanërisht atyre në drejtësi dhe zgjedhore. Kjo mbështetje do të jetë vendimtare për arritjen e objektivit kombëtar të përfundimit të negociatave brenda vitit 2027 dhe anëtarësimit të plotë brenda vitit 2030. Kryetarja vlerësoi gjithashtu kontributin e Gjermanisë për perspektivën evropiane të Ballkanit Perëndimor përmes Procesit të Berlinit.

Nga ana e saj, Presidentja Klöckner vlerësoi bashkëpunimin e gjithanshëm dhe konfirmoi se mbështetja e fuqishme e Gjermanisë për anëtarësimin e Shqipërisë në BE do të vijojë. Ajo siguroi se Bundestagu do të vazhdojë të bashkëpunojë dhe të ndihmojë Kuvendin e Shqipërisë në udhëheqjen e procesit të integrimit evropian.

Miqësia historike me Izraelin dhe lufta kundër antisemitizmit

Më vonë pasdite, Spiropali takoi edhe kryetarin e Knesset të Izraelit, Amir Ohana. Diskutimet mes tyre u fokusuan në partneritetin politik, bashkëpunimin ekonomik dhe marrëdhëniet e ngushta mes dy vendeve, të cilat kanë rrënjë në miqësinë e thellë historike dhe aktin unik të shqiptarëve për shpëtimin e hebrenjve gjatë Holokaustit.

“Shqipëria do të vijojë të jetë një zë i fuqishëm kundër antisemitizmit, pjesë e kontributit për respektimin dhe mbrojtjen e të drejtave themelore të njeriut, kundër padrejtësive dhe diskriminimit të çdo lloji,” u shpreh Spiropali.

Të dyja palët ranë dakord të intensifikojnë ndërveprimin mes Kuvendit të Shqipërisë dhe Knesset-it për të mbështetur marrëdhëniet e shkëlqyera dhe miqësinë e fortë mes dy popujve.

/rtsh.al/