I dërguari i posaçëm i SHBA-së, Steve Witkoff, zhvilloi një takim me kryeministrin izraelit, Benjamin Netanyahu, për të diskutuar mundësitë e rifillimit të negociatave për armëpushim në Rripin e Gazës. Vizita e tij vjen në një kohë kur situata humanitare në territorin palestinez është përkeqësuar ndjeshëm, me raportime për uri ekstreme.

Presidenti amerikan, Donald Trump, reagoi në rrjetet sociale duke thënë se zgjidhja më e shpejtë është që Hamasi të dorëzohet dhe të lirojë pengjet. Gjatë sulmit të 7 tetorit në Izrael, Hamasi vrau rreth 1.200 persona dhe rrëmbeu afro 250 të tjerë. Bisedimet për armëpushim në Doha mes Izraelit dhe Hamasit dështuan javën e kaluar, për shkak të mospajtimeve rreth tërheqjes ushtarake izraelite.

Ndërkohë, Izraeli po përballet me kritika ndërkombëtare për dëmet në Gazë dhe për ndalimin e ndihmave humanitare. Kanadaja ka paralajmëruar njohjen e shtetit palestinez, duke iu bashkuar presionit perëndimor. Izraeli i ka kthyer një përgjigje Hamasit për një propozim amerikan që përfshin një armëpushim 60-ditor dhe shkëmbimin e pengjeve me të burgosur palestinezë.

Disa zyrtarë izraelitë kanë paralajmëruar se bllokimi i negociatave mund të çojë në aneksimin e pjesëve të Gazës. Të paktën 23 civilë janë vrarë së fundmi nga sulmet izraelite, përfshirë 12 persona që prisnin ndihma në zonën Netzarim.

Ministria e Shëndetësisë në Gazë raporton se 156 vetë kanë vdekur nga uria dhe kequshqyerja, përfshirë 90 fëmijë. Numri i viktimave nga ofensiva izraelite ka kaluar 60.000 që nga tetori i vitit të kaluar.

Gazetar: A. Mata

/rtsh.al/