Zëvendëskryeministrja, Belinda Balluku, ka bërë të ditur përmes një postimi në Facebook se duke nisur nga 1 gushti, Inspektorati Kombëtar i Mbrojtjes së Territorit (IKMT) në bashkëpunim me Policinë e Shtetit, do të nisin aksione për lirimin e hapësirave në kufijtë e akseve rrugore kombëtare.

Sipas Ballukut, operacionet do të zhvillohen në përputhje me rregullat dhe ligjet për mbrojtjen e territorit, ndërsa ka theksuar se gjatë kësaj periudhe janë evidentuar edhe raste ku vetë subjektet kanë reaguar duke liruar hapësirat në mënyrë vullnetare.

“Nga data 1 gusht IKMT dhe Policia e Shtetit do të ndërmarrin aksione konkrete për lirimin e hapësirave në kufijtë e akseve kombëtare, duke respektuar rregullat dhe ligjet në fuqi për mbrojtjen e territorit. Gjatë kësaj periudhe janë identifikuar raste reagimi të vetë subjekteve, që janë për t’u marr shembull. I bëjmë thirrje të gjithë qytetarëve të vazhdojnë denoncimet kudo ku konstatojnë abuzime. Vetëm bashkë jemi të pandalshëm”, shkruan Balluku.

/rtsh.al/