Zjarre masive po shkatërrojnë pjesë të ndryshme të Evropës, duke zhvendosur mijëra njerëz dhe duke shkaktuar dëme të mëdha materiale dhe mjedisore. Fotot nga Agjencia Associated Press tregojnë dramën që po përjetohet në vendet e prekura, ku banorët vendas dhe vullnetarët janë bashkuar me zjarrfikësit në një përpjekje të dëshpëruar për të luftuar flakët.

Nga Spanja veriperëndimore deri në Greqinë perëndimore dhe Francën jugore, skenat e shkatërrimit janë të ngjashme. Njerëz të thjeshtë, të armatosur me kova uji dhe degë pemësh, shihen duke u përpjekur të shuajnë flakët pranë shtëpive të tyre. Në Greqi, një burrë shfaqet duke shpëtuar një dele në motoçikletë, ndërsa makina të djegura dëshmojnë fuqinë shkatërruese të zjarreve.

Pamjet nga ajri tregojnë helikopterë dhe aeroplanë që hedhin ujë pa pushim mbi zjarret, duke u përpjekur të kontrollojnë përhapjen e tyre. Në Francë, zjarret janë cilësuar si ndër më të mëdhenjtë në dekada, duke lënë pas makineri bujqësore dhe pyje të tëra të djegura. Ndërkohë, në Spanjë, fotot dramatike tregojnë edhe trupa kafshësh të ngordhura si pasojë e flakëve.

Kjo krizë e re e zjarreve në Evropë ka mobilizuar jo vetëm forcat zjarrfikëse, por ka nxjerrë në pah edhe solidaritetin e komuniteteve, të cilat po bashkohen për të mbrojtur jetët dhe pronat e tyre.

/rtsh.al/