Kryeministrja italiane Giorgia Meloni mori pjesë sot në një videokonferencë me Koalicionin e Vullnetarëve, ku u riafirmua nevoja për të ruajtur presionin kolektiv ndaj Rusisë dhe për të ofruar “garanci të forta dhe të besueshme sigurie” për Ukrainën. Lajmi u bë i ditur në një shënim zyrtar nga Palazzo Chigi, zyra e kryeministres.

Videokonferenca shërbeu si një moment koordinimi strategjik, pak para nisjes së Meloni-t për në Shtetet e Bashkuara, ku ajo pritet të takohet me homologët e saj për të diskutuar situatën aktuale.

Sipas deklaratës, diskutimi theksoi rëndësinë e bashkëpunimit me SHBA-në për t’i dhënë fund konfliktit dhe për të arritur një paqe të qëndrueshme. U ritheksua gjithashtu parimi se Ukraina duhet të jetë e përfshirë në çdo vendim që lidhet me të ardhmen e saj, duke siguruar sovranitetin dhe sigurinë e saj. Kjo qasje konfirmon angazhimin e Italisë për të mbështetur një zgjidhje diplomatike që respekton plotësisht integritetin territorial dhe sovranitetin e shtetit ukrainas.

/rtsh.al/