Një laborator përpunimi lëndësh të forta narkotike u gjet në zonën e Yzberishtit në Tiranë.

Policia e kryeqytetit saktësoi se laboratori u gjet në një shtëpi, aty ku përpunohej droga e më pas tregtohej në doza të vogla.

Policia prangosi pronarin e shtëpisë, 61-vjeçarin Shkëlqim K., ndërsa brenda banesës u gjetën dhe sekuestruan rreth 17 kg kanabis në formë çokollate, e cila ishte e ndarë në  69 paketime dhe 22,5 litra vaj kanabisi, që arrinin në vlerën rreth 500 mijë euro. 

Po ashtu, efektivët gjatë kontrollit të imtësishëm të banesës sekuestruan edhe rreth 65 gramë kokainë, si edhe dy armë zjarri, një pistoletë dhe një armë gjahu. 

Policia thotë se në kuadër të operacionit të koduar “Shape” po vijojnë hetimet për të zbuluar nëse ka persona të tjerë të përfshirë në këtë veprimtari kriminale.

Vijojnë hetimet për dokumentimin e plotë të kësaj veprimtarie kriminale, si dhe për identifikimin dhe kapjen e shtetasve të tjerë që mund të jenë të përfshirë. 

Gazetare: Flutura Tota

/rtsh.al/