Banorët e Nartës në Vlorë u mblodhën në sheshin para kishës së fshatit për të protestuar ndaj situatës së rënduar me mungesën e ujit të pijshëm. Ata tregojnë se prej tre muajsh uji vjen vetëm pesë minuta në mëngjes dhe pesë minuta pasdite.

“Narta mbytesh në ujë, ishim 6 mijë frymë. Tani në 2025 nuk kemi një pikë uji”.

“Paguhet uji dhe ujë nuk ka”.

“Shtete e Azisë, sidomos Izraeli, marrin ujin e detit dhe e kthejnë në ujë të pijshëm. Kurse neve ujin e pijshëm e hedhim në det”, u shprehën disa nga banorët.

Për shkak të mungesë, banorët detyrohen të marrin ujin pranë varrezave, aty ku ai shpërndahet vetëm dy herë në ditë.

“Në orën 6 deri 6:30 dhe pastaj mbaron uji, ndërkohë që në radhë është i gjithë fshati”, tha një banorë.

Banorët i janë drejtuar Bashkisë së Vlorës, Prefekturës dhe Ujësjellësit, për zgjidhje ndërsa paralajmërojnë se do t’i kërkojnë ndërhyrje edhe Kryeministrit. Nuk është hera e parë që banorët protestojnë. Vetëm dy muaj më parë, Ujësjellësi premtoi furnizim me autobot dhe zgjidhje të menjëhershme, por situata mbete e njëjtë.

“U vunë sahatet që të vijë ujë dhe të paguajmë. Kam 15 ditë këtu dhe asnjë pikë ujë”, tha një banore.

Banorët e Nartës thonë se nuk do të tërhiqen, derisa fshati të ketë furnizim të rregullt me ujë të pijshëm.

/rtsh.al/