Tre persona, pjesëtarë të një organizate kriminale janë arrestuar nga Forcat Operacionale në qarkun e Fierit.

Këta persona ishin shpallur në kërkim ndërkombëtar, pas dënimit me burg nga Gjykata e Riminit për veprat penale “Organizata kriminale” dhe “Trafikimi i  narkotikëve”.

Sipas Policisë, këta persona në bashkëpunim me njëri-tjetrin, gjatë muajve qershor-dhjetor të një viti më parë, blenë sasi të madhe droge me qëllim shitjen në Rimini të Italisë.

“Në vijim të operacioneve të njëpasnjëshme për kapjen e shtetasve të shpallur në kërkim ndërkombëtar, strukturat e Drejtorisë së Forcës së Posaçme Operacionale në DPPSh, bazuar në informacionet e siguruara, kapën gjatë 3 operacioneve të zhvilluara në qarkun e Fierit, 3 shtetas të kërkuar nga autoritetet italiane, konkretisht: 

-Në kuadër të operacionit “Operacionalja 61”, u kap dhe u vu në pranga shtetasi K. Sh., 24 vjeç, banues në Fier;

-Në kuadër të operacionit “Operacionalja 62” u kap dhe u vu në pranga A. M., 29 vjeç, banues në Fier;

-Në kuadër të operacionit “Operacionalja 63” u kap dhe u vu në pranga shtetasi E. F., 22 vjeç, banues në Fier”, thuhet në njoftim.

Interpol Tirana, në bashkëpunim me Interpol Romën, vijon procedurat për ekstradimin e këtyre shtetasve në Itali.

/rtsh.al/