Në një tjetër zhvillim të aksionit kombëtar kundër ndërtimeve pa leje, pasditen e kësaj të premteje, u shemb me shpërthim të kontrolluar resorti i ish-kreut të Inspektoratit të Mbrojtjes së Territorit (IMT) në Durrës, Ardian Halili. Ky veprim vjen vetëm dy ditë pas arrestimit të tij me akuzat për ndërtim të paligjshëm, korrupsion dhe shpërdorim detyre.

Forcat xheniere përdorën 80 kg lëndë plasëse për të shembur godinën dykatëshe të resortit, ndërsa objektet më të vogla u rrafshuan me fadromë. Nga verifikimet e kryera, u konfirmua se kompleksi “Saint Michelle Residence” ishte ndërtuar pa leje në një sipërfaqe prej 5600 m2. Ai përfshinte 11 kabina, një godinë dykatëshe, një fushë minifutbolli dhe një pishinë. Ironikisht, ndërtimi i tij kishte nisur në vitin 2018, pikërisht gjatë periudhës kur Halili shërbente si kreu i IMT-së.

Arrestimi i tij nga policia e Durrësit u krye të mërkurën, pasi hetimet zbuluan se ai, si një zyrtar i ngarkuar me luftën kundër ndërtimeve të paligjshme, dyshohet se ka qenë vetë protagonist i këtij fenomeni. Arrestimi i ish-inspektorit shihet si një hap i rëndësishëm në zbatimin e aksionit të paralajmëruar nga Kryeministri Edi Rama, i cili ka theksuar se askush nuk do të jetë imun, përfshirë edhe zyrtarët.

Rasti i Halilit dhe shembja e resortit të tij dërgojnë një mesazh të qartë se lufta kundër ndërtimeve pa leje po godet edhe ata që, për shkak të funksionit, duhet të ishin në vijën e parë të mbrojtjes së ligjit.

/rtsh.al/