Kryeministri Edi Rama, teksa ka publikuar pamje nga shembja e resortit të ish-kreut të IMT-së në Durrës, thotë se aksioni për lirimin e hapësirave publike vijon në të gjithë territorin, nga veriu në jug. Ish-kreu i IMT-së Durrës, Ardian Halili është ndaluar nga Policia, ndërsa ndaj tij kanë nisur edhe hetimet.

“Ca zëra në nisje të kësaj kthese të re thoshin “po pse Thethi e jo Jugu, po pse ashtu e jo kështu”, ndërkohë  puna për mbrojtjen e vendit nga abuzuesit vazhdon në Veri, Jug dhe Shqipërinë e Mesme, ku konkretisht në Durrës është vendosur rendi ligjor mbi një territor të marrë peng nga një abuzues, i cili është ndaluar nga Policia e Shtetit e i është dorëzuar drejtësisë edhe si ish-drejtues i inspektorëve të Durrësit”, shkruan Rama.

Forcat xheniere përdorën 80 kg lëndë plasëse për të shembur godinën dykatëshe të resortit, ndërsa objektet më të vogla u rrafshuan me fadromë. Nga verifikimet e kryera, u konfirmua se kompleksi “Saint Michelle Residence” ishte ndërtuar pa leje në një sipërfaqe prej 5600 m2. Ai përfshinte 11 kabina, një godinë dykatëshe, një fushë minifutbolli dhe një pishinë. Ndërtimi i tij kishte nisur në vitin 2018, pikërisht gjatë periudhës kur Halili shërbente si kreu i IMT-së.

Prej disa javësh, në të gjithë territorin e vendit janë liruar mijëra metra katrorë sipërfaqe publike të zëna në mënyrë abuzive, dhe tashmë pritet së shpejti paketa e masave për ata që lejuan këtë situatë.

/rtsh.al/