Izraeli ka njoftuar se zëdhënësi i krahut të armatosur të Hamasit, Abu Obeida është vrarë në një sulm ajror në qytetin e Gazës.

Ministri i Mbrojtjes i Izraelit, Israel Katz, ka përgëzuar Forcat e Mbrojtjes të Izraelit (IDF) dhe agjencinë e sigurisë së Izraelit, Shin Bet, për ekzekutimin e Obeidas në një postim në X.

Nga ana e tij, Hamasi nuk e ka konfirmuar lajmin. Grupi i armatosur palestinez tha më parë se dhjetëra civilë u vranë dhe u plagosën në sulmet ajrore izraelite në një ndërtesë banimi.

Gazetarët vendas raportuan se të paktën shtatë persona ishin vrarë dhe 20 të tjerë ishin plagosur në sulmet ajrore në lagjen al-Rimal të qytetit të Gazës, midis të cilëve kishte edhe fëmijë.

Katz paralajmëroi të dielën se shumë më tepër “partnerë kriminelë” të Obeidas do të jenë në shënjestër të “intensifikimit të fushatës në Gaza”.

Obeida ishte ndër të paktët anëtarë të lartë të mbetur të krahut ushtarak të Hamasit që nga sulmi i tij vdekjeprurës më 7 tetor 2023 në Izraelin jugor.

Pesë raketa goditën katin e dytë dhe të tretë të apartamentit gjashtëkatësh në ndërtesën e lagjes al-Rimal njëkohësisht nga dy drejtime të ndryshme.

Gjatë viteve të fundit, Obeida ka drejtuar një numër kritikash të gjata kundër Izraelit në emër të krahut ushtarak të Hamasit, Brigadave al-Qassam. Gjithmonë i maskuar me një shall palestinez, ai u bë idhull për mbështetësit e Hamasit në të gjithë Lindjen e Mesme.

/rtsh.al/