Me humor, ironi dhe reflektim mbi harresën, “Vendi më i humbur në Shqipëri” ngjiti në skenën e teatrit “Andon Zako Çajupi” të Korçës historinë e një fshati që nuk gjendet në asnjë hartë, por ku banorët nuk heqin dorë nga ëndrra për ta kthyer në një atraksion turistik.

Kjo shfaqje e trupës së teatrit Aleksandër Moisiu të Durrësit ka ardhur në natën e tretë të edicionit të 16-të të “Koko Fest”. Një komedi franceze e autorit Jean–Pierre Martinez, e sjellë nga regjisorja Andia Xhunga, e cila sjell një mesazh serioz për dëshirën për të mos mbetur të humbur.

“Është gjithmonë kënaqësi të jesh pjesë e ‘Koko Fest” dhe mbi të gjitha është kënaqësi të jesh para publikut korçar i cili është gjithmonë i ngrohtë dhe na pret me entuziazëm”, u shpreh aktori Romir Zalla.

“Është një vepër internacionale, është historia e disa njerëzve të cilët ndjehen të braktisur nga çdo gjë dhe bëjnë çmos që fshatin e tyre ta fusin në hartën e turizmit global”, u shpreh aktori Gentian Zenelaj.

“Vendi më i humbur në Shqipëri” ishte një komedi e mirëpritur nga publiku duke kujtuar me humor dhe finesë se edhe vendet më të harruara mund të rizbulohen, nëse nuk humbasim shpresën.

Gazetare: Kostanca Koçi

/rtsh.al/