Inspektorati i Mbrojtjes së Territorit i bashkisë së Vlorës zbriti në terren këtë të shtunë, ku fokus kishte lirimin e hapësirave publike nga tendat dhe karriget që ishin vënë në rrugët e qytetit.

Aksioni u përqendrua në disa nga rrugët dytësore të qytetit, ku bizneset kishin vendosur tenda, karrige dhe struktura të tjera pa leje.

Inspektorët e IMT në bashkëpunim me Policinë Bashkiake, kanë ndërhyrë për heqjen e elementëve që pengonin lëvizjen e lirë të qytetarëve dhe zinin hapësirat publike në mënyrë të paligjshme.

Përfaqësues të bashkisë u bëjnë thirrje qytetarëve dhe bizneseve të bashkëpunojnë për heqjen e tyre në mënyrë që rrugët të kenë aksesueshmëri lëvizjeje nga të gjithë.

Ky aksion pritet të vijojë edhe në ditët e ardhshme duke përfshirë zona të tjera problematike të qytetit.

Fillimisht aksioni u përqendrua në zonën e Lungomares dhe është pjesë e një fushate më të gjerë që synon të rikthejë rendin urban dhe të përmirësojë cilësinë e jetesës në qytet.

Gazetare: Flutura Tota

/rtsh.al/