INSTAT ka publikuar të dhënat mbi ecurinë e sektorit energjetik në tremujorin e dytë të vitit 2025.

Vlen të thuhet se konsumi i energjisë u rrit me 3,3% krahasuar me të njëjtën periudhë të 2024-ës, kur konsumi familjar pësoi rritje me 10,2%, ndërsa energjia e konsumuar nga konsumatorët jofamiljarë është ulur me 3,0%.

“Thatësira e gjatë ka bërë që të ketë një rënie në të gjitha vendet e Ballkanit dhe në Shqipëri. Nga ana tjetër, rritja e konsumit ka ardhur si rrjedhim i rritjes së konsumit të brendshëm, veçanërisht atij familjar, edhe si shkak i rritjes së numrit të turistëve. Kjo tregon më së miri varësinë e Shqipërisë ndaj burimeve hidroenergjetike”, tha eksperti ligjor për çështjet e energjisë, Lorenc Gordani.

Impiantet alternative si ato fotovoltaike, prodhuan 288 GWh nga 125 GWh që u prodhuan në të njëjtën periudhë të një viti më parë, duke shënuar një rritje të konsiderueshme të prodhimit të energjisë elektrike.

“Vitet e fundit kemi investime të rëndësishme në sektorët fotovoltaikë dhe burimet e tjera, që ka bërë që të kemi 2,5 herë më shumë burim të shtuar nga burimet alternative”, tha Gordani.

Importi i energjisë elektrike gjithashtu pësoi një rritje, duke ekspozuar sektorin ndaj çmimeve të importit.

“Situata e tejzgjatur e thatësirës na ka bërë më të ekspozuar drejt importit, që do të thotë edhe çmime më të kripura. Rajoni në këtë moment po vuan nga i njëjti problem”, u shpreh eksperti.

Një zhvillim pozitiv vjen nga menaxhimi i rrjetit, ku humbjet shënuan një rënie me 1%. Kjo tregon një administrim më efikas të sistemit të shpërndarjes së energjisë elektrike.

Gazetar: Omer Saraçi

/rtsh.al/