Nesër në orën 13:00 në “Niko Dovana” të Durrësit, Teuta dhe Dinamo City do të zhvillojnë ndeshjen e prapambetur, të vlefshme për javën e parë të Abissnet Superiore.

Në vigjilje të këëtij dueli doli sot përballë gazetarëve, trajneri ekipit durrsak, Enkeleid Dobi. “Si çdo ndeshje tjetër, edhe këtë herë jemi përgatitur me seriozitet. E vetmja gjë që ka ndryshuar është fakti se kemi pasur më pak kohë në dispozicion krahasuar me një javë normale mes ndeshjeve”, tha trajneri i Teutës.

I pyetur mbi rivalen e radhës, Dobi tha: “Dinamo edhe sezonin e kaluar zhvilloi një kampionat të mirë dhe ka ruajtur vazhdimësinë, si në staf ashtu edhe në organizimin e klubit. Kohët e fundit ka treguar ambicie të larta, sidomos me paraqitjet në Europë, ku dëshmoi se është një ekip solid. Sot, mund të them se është skuadra më e mirë në Shqipëri dhe meriton respektin tonë”.