Ministri në detyrë i Punëve të Brendshme, Xhelal Sveçla, ka reaguar pas zbulimit të një arsenali ushtarak në pronën e Nemanja Radivojević, i njohur si “Gandi”, i cili dyshohet si autor i shpërthimit të bombës në Banjskë më 24 shtator 2023, ku humbi jetën rreshteri policor Afrim Bunjaku, shpallur Hero i Kombit.

Në një postim në Facebook, Sveçla publikoi pamje të materialeve të sekuestruara, përfshirë municion, pajisje ushtarake e policore, si dhe veshje kamuflazhi.

Ai deklaroi se gjetjet janë dëshmi të qarta për përgatitjet e gjata të një grupi kriminal të dirigjuar nga Serbia, me synim destabilizimin e rendit kushtetues të Republikës së Kosovës.

“Për aq kohë sa Serbia refuzon t’i dorëzojë këta persona, ata mbeten një rrezik i drejtpërdrejtë për Republikën tonë. Por institucionet tona të sigurisë janë më të forta se kurrë dhe nuk do të lejojnë që elemente kriminale e terroriste të cenojnë Kosovën,” tha Sveçla.

Autoritetet e sigurisë kanë konfirmuar se rasti është nën hetim.

/rtsh.al/