Izraeli ka njoftuar një zhvillim të rëndësishëm në aftësitë e tij mbrojtëse, duke përfunduar me sukses ndërtimin dhe testimin e një sistemi të ri mbrojtës me rreze lazer, i quajtur “Rreza e Hekurt”. Ky sistem është projektuar për të neutralizuar një gamë të gjerë kërcënimesh ajrore me një kosto operative jashtëzakonisht të ulët.

Sipas Ministrisë izraelite të Mbrojtjes, provat e kryera gjatë disa javëve kanë dëshmuar se sistemi mund të kapë dhe shkatërrojë me saktësi raketa, predha mortajash, avionë dhe dronë, duke dëshmuar efikasitetin e tij në skenarë të ndryshëm operacionalë.

Moment historik për mbrojtjen izraelite

Ministri i Mbrojtjes, Israel Katz, e ka cilësuar këtë arritje si një “moment historik” për Izraelin. Ai theksoi se “Rreza e Hekurt” është një sistem mbrojtës ajror me rreze lazer, i komanduar nga toka, i cili falë precizitetit dhe efikasitetit të lartë, mund të neutralizojë kërcënime me një kosto minimale.

Sipas të dhënave të SHBA-së, kostoja për të neutralizuar një dron me këtë sistem është rreth katër dollarë për operacion. Ky shpenzim i ulët e bën sistemin një alternativë shumë ekonomike dhe efikase kundër sulmeve me kosto të lartë.

Sistemet e para të mbrojtjes me rreze lazer pritet të integrohen në sistemin ekzistues të mbrojtjes ajrore të Izraelit deri në fund të vitit.

/rtsh.al/