Jo vetëm fëmijët, por edhe breza të tërë prindërish e njohin dhe e kujtojnë aktoren që i dha jetë skenës së teatrit të kukullave. Prej 41 vitesh, Florinda Mazreku ia ka kushtuar jetën artit të kukullave, duke lënë kujtime të pashlyeshme te publiku i vogël dhe jo vetëm. Këtë shtator ajo festoi 70-vjetorin e lindjes, një përvjetor që nuk mund ta ndante pa personazhet e saj të dashur, me të cilët është e lidhur ngushtë.

“Vërtet e festova ditëlindjen me familjen time por nuk më zinte vendi që unë të vija këtu në teatër dhe ti ftoja të gjithë personazhet e mia”, u shpreh Mazreku.

Zëri dhe ëmbëlsia e saj bënë për vete me qindra fëmijë, ndërsa mes personazheve të shumtë veçohet “Borëbardha”, që mbeti simbol i karrierës së saj.

“Borëbardha ka qenë shumë interesante sepse ishte ajo borëbardhë që fëmijët e shihnin nëpër emisionet e fëmijëve. Kur flas për teatrin më lëvizin të gjithë gjymtyrët e mia”, thotë ajo.

Edhe pse prej dhjetë vitesh në pension, kukullat nuk i ka lënë kurrë pas dore çdo mbrëmje ajo u lexon nipërve dhe mbesave përralla, duke e mbajtur gjallë botën magjike të fëmijërisë.

Florinda Mazreku është një copëz e çmuar historie e teatrit të kukullave, ku me përkushtim e dashuri dhuroi art dhe emocion.

/rtsh.al/