Një burrë në të dyzetat është arrestuar në West Sussex, Angli, nën dyshimin se është i përfshirë në sulmin kibernetik që shkaktoi probleme të mëdha në sistemet e regjistrimit të disa prej aeroporteve më të rëndësishme të Evropës javën e kaluar. Këtë e bëri të ditur Agjencia Kombëtare e Krimit (NCA) e Mbretërisë së Bashkuar.

Sulmi kibernetik, i cili shënjestroi kompaninë e aviacionit Collins Aerospace, solli ndërprerje të mëdha në aeroportet e Londrës (Heathrow), Brukselit, Berlinit dhe Dublinit. Pasagjerët u përballën me radhë të gjata dhe detyroheshin të bënin regjistrimin manualisht. Në aeroportin e Brukselit, punonjësit përdorën iPad-ë dhe laptopë, ndërsa në Berlin pasagjerëve u dhanë karta imbarkimi të shkruara me dorë.

Paul Foster, kreu i Njësisë Kombëtare të Krimit Kibernetik në NCA, deklaroi se arrestimi është një hap pozitiv, por theksoi se hetimi është në fazat e tij të hershme. “Krimi kibernetik është një kërcënim i vazhdueshëm global,” tha ai, duke theksuar përkushtimin e NCA-së për të zvogëluar këtë rrezik dhe për të mbrojtur publikun.

Ndërsa burri i dyshuar është liruar me kusht, efektet e sulmit vazhdojnë të ndihen. Aeroporti i Berlinit njoftoi se ende po has vështirësi dhe se “vonesat dhe anulimet nga linjat ajrore mund të vazhdojnë edhe sot”. Në anën tjetër, Aeroporti Heathrow i Londrës dhe ai i Brukselit njoftuan se shumica e fluturimeve po operojnë normalisht, megjithëse me ndërprerje të kufizuara.

/rtsh.al/