Njësia Administrative e Lunxhërisë po merr masa të rëndësishme për sezonin e vjeshtës.

Në fokus të masave kryesore janë ndërhyrjet në kanalet kulluese, si dhe rikonstruksioni i infrastrukturës rrugore.

Sipas administratorit të njësisë, Enton Suli, gjatë viteve të fundit janë evidentuar një sërë problematikash, për të cilat tashmë po merren masa për përmirësim.

“Po punojmë për pastrimin e kanaleve kulluese brenda fshatrave dhe anës rrugëve kryesore. Problematik ka qenë kanali i Haznakut. Vitin e kaluar është bërë pastrimi i kanalit të madh. Nuk pati bllokim të rrugës gjatë shirave të dimrit. Edhe te rruga e Dhoksatit, pasi kur ka reshje të tepërta del uji mbi rrugë, kemi bërë pastrimin e kanalit. Problematikë kemi edhe te rruga e Kakozit, pasi gjatë dimrit bllokohet një urë ku kalon përroi. Edhe atë e pastrojmë para sezonit të dimrit,” thotë z. Suli.

Ai thekson se një ndër arritjet më të rëndësishme është ndërgjegjësimi i banorëve, të cilët tani janë më të kujdesshëm dhe nuk hedhin më mbetje në vende të papërcaktuara.

“Banorët janë ndërgjegjësuar. Nuk hedhin më mbetje nëpër kanale,” tregon administratori i njësisë.

Me masat që po ndërmerren, do të parandalohet çdo problem që mund të lindë gjatë këtij sezoni, duke siguruar kushte më të mira për banorët dhe përmirësimin e cilësisë së jetesës në këtë zonë.

/rtsh.al/