Ambasadori i Bashkimit Evropian në Shqipëri, Silvio Gonzato, zhvilloi një takim zyrtar me ministrin e ri të Mjedisit, Sofjan Jaupaj.

Në një postim të Delegacionit të BE-së në Shqipëri, u bë e ditur se gjatë takimit u theksuan disa sfida kyçe që lidhen me mbrojtjen e natyrës, menaxhimin e mbetjeve, përmirësimin e cilësisë së ujit dhe ajrit, si dhe luftën kundër krimeve mjedisore.

“Mbrojtja e natyrës, menaxhimi i mbetjeve, përmirësimi i cilësisë së ujit dhe ajrit, si dhe lufta kundër krimeve mjedisore janë sfida kyçe në rrugën e Shqipërisë drejt BE-së. Përballimi i këtyre sfidave do të sjellë përfitime të drejtpërdrejta në jetën e përditshme të qytetarëve shqiptarë.”- thuhet në njoftim.

Ambasadori Gonzato vuri në dukje se përballimi i këtyre sfidave do të sjellë përfitime të drejtpërdrejta për qytetarët shqiptarë.

“Shqipëria duhet të linjëzohet me legjislacionin e BE-së për të përmbushur kriteret përmbyllëse për Kapitullin 27 (Mjedisi dhe ndryshimet klimatike)”, deklaroi Gonzato.

Ai siguroi ministrin Jaupaj për mbështetjen e vazhdueshme të BE-së në zbatimin e prioriteteve mjedisore dhe përpjekjet për përmirësimin e standardeve.

/rtsh.al/