Ministri i Jashtëm i Egjiptit, Badr Abdelatty, ka akuzuar Izraelin për “gjenocid” në Rripin e Gazës dhe për ndjekjen e një politike të “agresionit të qëllimshëm” në Lindjen e Mesme.

Gjatë fjalimit në Asamblenë e Përgjithshme të Kombeve të Bashkuara, Abdelatty  e cilësoi politikën e Izraelit si të bazuar në një “ideologji ekstremiste” që destabilizon rajonin dhe bie ndesh me qëllimet e OKB-së.

“Pushtimi i vazhdueshëm izraelit, gjenocidi që po ndodh sot në Rripin e Gazës, dhe mohimi i të drejtave legjitime të popullit palestinez, veçanërisht e drejta për të krijuar shtetin e tyre të pavarur, e bëjnë të pamundur çdo narrativë për paqe dhe siguri në rajon,” deklaroi Abdelatty.

Ai shtoi se “Izraeli nuk mund të jetë i sigurt kur të tjerët nuk janë të sigurt. Rajoni nuk mund të shohë stabilitet pa një shtet të pavarur të Palestinës.”

Në një fjalim që kryesisht u përqendrua te Izraeli, Abdelatty dënoi sulmin e fundit izraelit kundër udhëheqësve të Hamasit në Katar, si dhe akuzoi Izraelin për shkelje të sovranitetit të Sirisë dhe Libanit, ku Forcat e Mbrojtjes së Izraelit (IDF) kanë vendosur trupa në zonat kufitare.

Po ashtu, ai akuzoi Izraelin për ndjekjen e një politike të “urinë sistematike” në Gazë. Izraeli ka hedhur poshtë me forcë akuzat për gjenocid në Gaza dhe ka mohuar pretendimet për uri të përhapur, duke deklaruar se merr masa për të shmangur viktimat civile dhe për të lehtësuar rrjedhën e ndihmave humanitare në enklavë.

Abdelatty, përfaqësues i një vendi që ka luajtur rolin e ndërmjetësuesit në bisedimet për armëpushim mes Izraelit dhe Hamasit, vlerësoi planin e Presidentit të SHBA-së, Donald Trump, për t’i dhënë fund luftës në Gaza.

Plani përfshin lirimin e të gjithë pengjeve izraelitë, largimin e Hamasit nga pushteti dhe krijimin e një rruge politike për një shtet palestinez.

/rtsh.al/