Kryeministri francez, Sébastien Lecornu, ka dhënë dorëheqjen vetëm disa orë pas emërimit të qeverisë së re nga Presidenti Emmanuel Macron. Ky kabinet, i cili është pothuajse i pandryshuar nga i mëparshmi, është përballur me kritika të ashpra nga të gjitha spektrat politikë dhe ka dështuar të përballojë krizën politike që po përjeton vendi.

“Isha gati për kompromis, por secila parti politike donte që partia tjetër politike të miratonte të gjithë programin e saj”, tha Lecornu.

Ai këmbënguli se kishte punuar për javë të tëra për të krijuar një rrugë të qëndrueshme midis partnerëve socialë, sindikatave dhe politikanëve nga i gjithë spektri. Ai theksoi se premtimi i tij për të mos miratuar legjislacionin pa një votim parlamentar ishte një ndryshim i madh nga vitet e kaluara dhe duhet të kishte qenë mjaftueshëm domethënës që politikanët e opozitës ta kishin mbështetur atë.

“Do të duhej pak që të funksiononte. Njeriu gjithmonë duhet ta vërë vendin para partisë së tij” tha ai.

Lecornu, i cili u emërua si kryeministër një muaj më parë, pati kërkuar mbështetje ndërpartiake në një parlament thellësisht të ndarë. Megjithatë, përbërja e kabinetit të tij, e zbuluar mbrëmjen e kaluar, ka hasur reagime të forta kundërshtuese, duke shtuar tensionet politike.

Partia e ekstremit të djathtë, Tubimi Kombëtar, i ka bërë thirrje Presidentit Macron të shpërndajë Asamblenë Kombëtare dhe të mbajë zgjedhje të reja.

“Duket se Presidenti Macron nuk e kupton situatën që po kalon vendi. Nuk mund të ketë stabilitet pa kthim në zgjedhje”, ka deklaruar lideri i partisë, Jordan Bardella.

Në anën tjetër, Mathilde Panot, kryetarja e grupit të La France Insoumise (LFI), ka theksuar se Macron duhet të largohet.

“Tre kryeministra të mundur në më pak se një vit. Numërimi mbrapsht ka filluar,” ka thënë Panot.

Macron, i cili ka emëruar këtë qeveri të re në një përpjekje për të nxjerrë vendin nga kriza politike, ka pranuar dorëheqjen e Lecornu. Megjithatë, sfidat politike vazhdojnë të mbeten të mëdha për presidentin francez, ndërkohë që kërkesat për ndryshime të shpejta dhe për një qeveri më të qëndrueshme janë gjithnjë e më të fuqishme.

/rtsh.al/