Këshilli i Lartë i Prokurorisë (KLP) ka njoftuar një mbledhje plenare për ditën e enjte, më 16 Tetor 2025, në orën 11:00, me një rend dite me tetë pika kryesore që prekin organizimin dhe karrierën e prokurorëve.

Mbledhja, e thirrur nga Kryetari i Këshillit, do të mbahet në prani të anëtarëve të KLP-së, si dhe të përfaqësuesve të Prokurorit të Përgjithshëm, Ministrisë së Drejtësisë, Projektit Eu4Justice dhe Programit OPDAT, duke nënvizuar rëndësinë e vendimeve që do të merren.

KLP do të diskutojë dhe miratojë caktimin e përkohshëm të dy magjistrateve: Pranvera Pustina në pozicionin e prokurorit në Prokurorinë e Përgjithshme; Elidjana Kasa në pozicionin e prokurorit në Prokurorinë pranë Gjykatës së Apelit të Juridiksionit të Përgjithshëm.

Këshilli pritet të miratojë projektvendimet “Për përfundimin pa vendim përfundimtar” të procedurave për ngritjen në detyrë në pozicionin e Drejtuesit në Prokuroritë e Kukësit, Beratit dhe Sarandës.

Në fund të rendit të ditës, KLP do të shqyrtojë miratimin e Projektraportit të Vlerësimit Etik dhe Profesional për prokuroren Irma Balli. Gjithashtu, do të bëhet një ndryshim në vendimin e Këshillit lidhur me praktikën profesionale të kandidatëve të profilit prokuror të Shkollës së Magjistraturës për vitin akademik 2025-2026.

/rtsh.al/