Analisti politik Lorenc Vangjeli ka ngritur akuza të publike ndaj disa segmenteve të medias, duke pretenduar se ato po përdoren nga segmente të caktuara brenda Struktures së Posaçme Anti-Korrupsion (SPAK), duke u shndërruar në “palë të padeklaruar në procesin” e drejtësisë.

Vangjeli theksoi se media duhet të jetë një pushtet i pavarur dhe se marrëdhënia e saj me SPAK-un është “e ndërlikuar”.

“Kemi një bërthamë në media që është përdorur nga segmente të SPAK-ut, duke përdorur segmente të caktuara të medias si palë të padeklaruar në proces,” tha Vangjeli.

Dëmi i shkaktuar nga rrjedhjet

Analisti theksoi se publikimi i materialit hetimor në media, ka krijuar perceptime të gabuara në publik dhe ka shërbyer si fillesa për “gjykime popullore”.

Problemi më i madh, sipas Vangjelit, është se këto rrjedhje informacioni “kanë dëmtuar rëndë proceset ligjore.”

Në fund, ai e zhvendosi theksin e përgjegjësisë tek institucioni i drejtësisë.

“Fajin e ka kasaforta që ruan dokumentet. S’kemi ende asnjë fajtor se kush i ka bërë këto,” përfundoi Vangjeli.

/rtsh.al/