Shtëpia e Bardhë njoftoi se presidenti Donald Trump ka falur Changpeng Zhao-n, themeluesin e Binance, platformës më të madhe të kriptomonedhave në botë. Zhao ishte ndjekur penalisht nga administrata Biden për shkelje në industrinë e kriptove, por nuk kishte akuza për mashtrim apo viktima.

Zëdhënësja e Shtëpisë së Bardhë, Karoline Leavitt, tha se kjo ndjekje ishte pjesë e një sulmi ndaj gjithë sektorit të kriptovalutave. Në vitin 2023, Binance u shpall fajtore për shkelje të rregullave kundër pastrimit të parave dhe sanksioneve.

Kompania pranoi të paguante mbi 4 miliardë dollarë dëmshpërblim dhe u ndalua të operonte në SHBA. Zhao u shpall fajtor për mosmbajtjen e një programi efektiv kundër pastrimit të parave dhe u dënua me 4 muaj burg, nga të cilët vuajti pjesën më të madhe dhe u lirua në shtator 2024. Gazeta Wall Street Journal raportoi se Binance kishte punësuar lobistin Ches McDowell për të kërkuar falje presidenciale për Zhao-n.

Po ashtu, Binance mbështeti një sipërmarrje të lidhur me familjen Trump. Ndërkohë, versioni amerikan ‘Binance.US’ vazhdoi të funksionojë, ndërsa kompania mëmë nuk operon më në SHBA. Falja e Trump mund të hapë rrugën për rikthimin e Binance në tregun amerikan. Ky vendim vjen pas një periudhe të gjatë përplasjesh ligjore dhe politike për industrinë e kriptomonedhave. Zhao tashmë është jashtë burgut dhe falja mund t’i japë atij mundësinë për të rifilluar aktivitetet e tij në SHBA.

/rtsh.al/