Këshilli i Ministrave pritet të miratojë Planin Kombëtar për Rinovimin e Ndërtesave, një strategji afatgjatë që synon të mobilizojë investime të thella në stokun ekzistues rezidencial, publik dhe të shërbimeve. Vendimi, i cili është në fazën e projektligjit, lidhet drejtpërdrejt me Ligjin për Performancën Energjetike dhe Planin Kombëtar të Energjisë dhe Klimës.

Plani i miratuar vendos objektiva ambicioze me fokus kryesisht në përmirësimin e performancës energjetike dhe mjedisore duke promovuar ndërhyrje për të përmirësuar ndjeshëm performancën energjetike të ndërtesave.

Sipas relacionit, objektivi kryesor është transformimi i stokut ekzistues të ndërtesave në ndërtesa pa emetime deri në vitin 2050, duke kontribuar në Marrëveshjen e Parisit. Një fokus i veçantë i kushtohet reduktimit të varfërisë energjetike për familjet.

Argumentimi i projekt-vendimit thekson disa përparësi të pritshme. Ndërhyrjet e thella në izolimin termik dhe sistemet e ngrohjes/ftohjes pritet të sjellin ulje të ndjeshme të konsumit të energjisë elektrike dhe termike, duke ulur kostot për familjet dhe institucionet.

“Implementimi i masave të rinovimit do të gjenerojë kërkesë për fuqi punëtore në ndërtim dhe sektorë mbështetës, duke nxitur zhvillimin ekonomik,” thuhet në relacionin shpjegues.

Sfida e financimit

Relacioni evidenton se sfida kryesore mbetet sigurimi i burimeve financiare për zbatimin e gjerë të projekteve, veçanërisht për kategoritë vulnerabël. Për këtë, Këshilli i Ministrave pritet të hartojë vendime specifike për skemën e mbështetjes financiare për rinovimin e ndërtesave të banimit, ndërkohë që rinovimet për institucionet qendrore do të mbulohen nga buxheti i shtetit.

Për të siguruar zbatimin, ministria përgjegjëse për energjinë do të detyrohet të përgatisë një raport statusi çdo dy vjet, duke u integruar në raportin progresiv të Planit Kombëtar të Energjisë dhe Klimës. Plani do të rishikohet çdo pesë vjet.

/rtsh.al/